SA - Björninn 3. leikur í úrslitum


Frá leik liðanna á laugardaginn                                                                                             Mynd: Elvar Freyr Pálsson

Þriðji leikur í úrslitakeppni meistaraflokks kvenna fór fram á laugardaginn en þar áttust við SA og Björninn. Leiknum lauk með sigri SA sem gerðu 6 mörk gegn 2 mörkum Bjarnarkvenna. Með sigrinum tryggðu SA-konur sér íslandsmeistaratitilinn 2012.

Nokkuð jafnræði var með liðunum í fyrstu lotu en það voru SA-konur sem gerðu fyrsta markið á fimmtu mínútu og var þar á ferðinni Diljá Sif Björgvinsdóttir en hún átti eftir að láta töluvert að sér kveða í leiknum. Bjarnarkonur náðu hinsvegar að jafna leikinn rúmlega mínútu fyrir leikhlé og staðan því 1 – 1 eftir fyrstu lotu. Mark Bjarnarkvenna gerði Flosrún Vaka Jóhannesdóttir.

Í annarri lotu jókst sóknarþungi SA-kvenna til muna en það var fyrrnefnd Diljá sem kom þeim yfir fljótlega í lotunni og um miðja lotu bætti systir hennar Silvía Rán við marki og norðankonur komnar í vænlega 3 – 1 stöðu. Flosrún Vaka minnkaði hinsvegar muninn fyrir Bjarnarkonur skömmu síðar en það voru SA-konur sem áttu lokaorð lotunnar þegar Sarah Smiley skoraði rétt fyrir lotulok. Staðan því 4 – 2 eftir aðra lotu SA-konum í vil.

Leikurinn jafnaðist svo nokkuð í 3ju lotu en það voru SA-konur sem gerðu mörkin sem bæði komu í byrjun lotunnar. Diljá Sif átti fyrra markið og fullkomnaði þar með þrennu sína en síðara markið átti Guðrún Blöndal.

Við óskum SA-konum að sjálfsögðu til hamingju með titilinn.

Mörk/stoðsendingar SA:

Diljá Sif Björgvinsdóttir 3/1
Silvía Rán Björgvinsdóttir 1/2
Sarah Smiley 1/2
Guðrún Blöndal 1/0

Refsingar SA: 14 mínútur

Mörk/stoðsendingar Björninn:

Flosrún Vaka Jóhannesdóttir 2/0
Steinunn Sigurgeirsdóttir 0/2

Refsingar Björninn:  6 mínútur.