HM í Zagreb - Pistill 1

Ingvar blokkar skot, Dennis klár.  Ljósm. KMAACK
Ingvar blokkar skot, Dennis klár. Ljósm. KMAACK

Nú er fyrsta keppnisdegi íslenska karlalandsliðsins í íshokkí lokið hér í höfuðborg Króatíu, Zagreb.  Ferðalagið hingað gekk vel, allt gekk eins og smurð vel, allar áætlanir stóðust og allir komust á leiðarenda ásamt öllum farangri.

Hér á keppnisstað er jafnframt allt eins og best verður á kosið, hótelið gott og skautahöllin við hliðina á hótelinu og veðrið leikur við okkur enda hér farið að vora, fuglarnir syngja í trjánum og hitastigið er um 20°.

Liðið mun etja kappi við erfiða andstæðinga hér í Zagreb næstu vikuna en mótherjarnir eru auk heimamanna, Belgía, Serbía, Spánn og Ástralía.   Aðeins Serbíu hefur Íslands unnið áður en það var á HM í fyrra í Reykjavík 5 – 3.

Fyrsti leikurinn var í dag gegn Belgum og lauk þeim leik með 1 – 4 ósigri en segja má að tölurnar gefi ekki rétta mynd af leiknum.   Liðið fór hægt af stað og virkaði óöruggt í upphafi en óx ásmeginn þegar leið á leikinn.  Markmaður Belga var góður og þeir komust jafnframt allt of mikið í skyndisóknir.

Eina mark Íslands skoraði Emil Alengaard og hann var í leikslok valinn besti leikmaður íslenska liðins.  Kristján Maack var með myndavélina á lofti og afraksturinn má sjá hér

Á morgun mætum við Áströlum kl. 13:00 að staðartíma sem er kl. 11:00 heima á klakanum.  Við Ástralíu spiluðum við síðast árið 2008 á þeirra heimavelli og töpuðum 3 – 0.  Við getum gert betur en það og munum láta andfætlingana finna vel fyrir okkur.