Tveir leikir fóru fram á Akureyri í gær
Skautafélag Reykjavíkur hélt norður yfir heiðar í gær með báða meistaraflokka félagsins. Báðir leikirnir voru miklir markaleikir og margt sem gladdi augað. Fyrri leikurinn hófst kl. 16:30 og voru það karlarnir sem riðu á vaðið. Liðin skiptust að skora allan leikinn og jafnræði hélst með liðunum fram á síðustu mínútu. Það voru þó SR-ingar sem voru sterkari á endasprettinum og leiknum lauk 8 - 6 eftir að síðasta markið kom eftir að SA hafði dregið markmann sinn úr netinu.
Kvennaliðin mættust strax á eftir og þar mættust SR og yngra lið SA, Ynjur. Eftir fyrstu lotu var staðan 2 - 0 fyrir Ynjur en leikurinn snérist við í 2. lotu og þá var staðan orðin 4 - 3 SR í vil. 3. lotan var spennandi en Ynjum tókst að knýja fram eins marks sigur í skemmtilegum leik, lokastaðan 5 - 4.